លទ្ធផលពីការប្រឡង រូបវិទ្យាអន្តរជាតិ
សិស្សកម្ពុជាទាំងប្រាំរូបដែលចូលរួមការប្រឡង
សិស្សកម្ពុជានិងសិស្សប្រទេសផ្សេងទៀតកំពុងពិនិត្យមើលប្លង់អគារសាកលវិទ្យាល័យ
រូបវិទ្យាអន្តរជាតិ (IPho: International Physics Olympiad) ជាការប្រឡងដ៏ធំមួយផ្នែករូបវិទ្យា
សំរាប់សិស្សកំរិត វិទ្យាល័យនៅជុំវិញពិភពលោក ដែលបានបង្កើតឡើងដំបូងនៅឆ្នាំ១៩៦៧ ដោយ
លោកសាស្រ្តាចារ្យ Czesław Ścisłowski នៅ Warsaw, Poland ដោយការប្រឡងនេះមានលក្ខណៈ
ខុសពីការប្រឡងខាងផ្នែកគណិតវិទ្យា (IMO:International Mathematical Olympiad) ដោយ
បេក្ខជនដែលចូលរួមត្រូវប្រឡងទាំងទ្រឹស្តី (theoretical problems) និងការពិសោធន៍
(experimental problems)ហេតុនេះហើយគឺត្រូវចំនាយថវិការច្រើនសំរាប់ប្រទេស
ដែលធ្វើជាម្ចាស់ផ្ទះ។
ដោយឡែក, ក្នុងឆ្នាំនេះគឺជាខួបលើកទី៤២ នៃការប្រឡងដ៏ធំនេះ
ដែលបានធ្វើឡើងនៅប្រទេសសៀមនាទីក្រុងបាងកក ចាប់ពីថ្ងៃ
ទី ១០ ដល់ ១៨ខែកក្កដា ដោយហេតុថាប្រទេស Belgium ដែល
ត្រូវជាម្ចាស់ផ្ទះពិតប្រាកដបានជួបប្រទះនូវបញ្ហាខាងហិរញ្ញវត្ថុក្នុង
ការរៀបចំការប្រឡងដ៏ធំនេះ។
ក្នុងឆ្នាំនេះ,ព្រះរាជាណាចក្រកម្ពុជាយើងក៏ជាសមាជិកក្នុងការប្រឡងដ៏ធំនេះដែរ ដោយមាន
បេក្ខជនចំនួនប្រាំរូបដែលបានចូលរួមប្រកួតប្រជែងនេះ។ ជាលទ្ធផលផ្លែផ្កាគឺប្រទេសយើង
ឆ្នាំនេះ បានសំរេចនូវស្នាដៃដ៏គួឲ្យកោតសរសើរដោយមានបេក្ខជនចំនួនបីរូប ដែលបានទទួល
បានមេដាយ ក្នុងនោះមាន៖
ទី១៖ Sorn Sopheak ទទួលបានមេដាយប្រាក់ ធ្វើបាន ៣៤.៥០ពិន្ទុ
ទី២៖ Kim Pichatha ទទួលបានមេដាយសំរិទ្ធ ធ្វើបាន ២៦.០០ពិន្ទុ
ទី៣៖ Meas Sopheap ទទួលបានមេដាយកិត្តិយស ធ្វើបាន ២៣.៥០ពិន្ទុ
សមិទ្ឋិផលនេះ គឺជាការបញ្ជាក់យ៉ាងច្បាស់ពីការរីកចំរើនខាងវិស័យអប់រំនៅប្រទេសកម្ពុជាយើង
និងបញ្ជាក់ពីសម្ថភាពរបស់កូនខ្មែរយើង ថាយើងក៏មិនចាញ់ប្រទេសដ៏ទៃទៀតដែរ។
ញ៉ុមផ្ទាល់ពិតជាមានការសប្បាយរីករាយ និងសូមចូលរួមអបអរសាទរដល់អ្នកដែលបានទទួល
ជោគជ័យក្នុងការប្រឡងនេះ ដែលបាននាំមកជូនជាតិនូវកិត្តិយសដ៏មានតំលៃធំធេងនេះ ។
សង្ឃឹមថា ប្រទេសកម្ពុជាយើងនឹងបន្តបាននូវការអភិវឌ្ឍន៍ខាងវិស័យអប់រំនេះទៅថ្ងៃខាងមុខ
ដើម្បីបណ្តុះធនធានមនុស្សឲ្យបានដូចប្រទេសអភិវឌ្ឍន៍ និងកំពុងអភិវឌ្ឍន៍ដែលមានការរីកចំរើន
ខ្លាំងខាងវិស័យអប់រំនេះ ព្រោះនេះជាកូនសោរដ៏សំខាន់ក្នុងការកសាងនិង អភិវឌ្ឍន៍ប្រទេសយើង។
ម្យ៉ាងទៀត, ញ៉ុមក៏សូមចូលរួមសំដែងការសោកស្តាយចំពោះក្រុមគណិតវិទ្យាខ្មែរនៅឆ្នាំនេះដែល
មិនបានទៅបញ្ចេញសម្ថភាពនៅលើឆាកអន្តរជាតិ ដោយមូលហេតុដ៏គួរឲ្យខ្មាសគេរបស់ថ្នាក់ដឹកនាំ
ក្រសួងអប់រំរបស់យើង។ ញ៉ុមនិយាយនេះ គឺជាសំដែងពីអារម្មណ៍ឈឺចាប់មួយក្នុងនាមជា
សិស្សម្នាក់ជាពលរដ្ឋខ្មែរម្នាក់ ដែលចង់ឃើញប្រទេសយើងមានមុខមានមាត់ខាងវិស័យអប់រំដែល
មានតែការប្រឡងជាអន្តរជាតិដូចនេះហើយទើបអាចបញ្ជាក់បានថាកំរិតអប់រំរបស់ប្រទេសយើង
ស្ថិតនៅក្នុងកំរិតណា មានសន្ទុះទៅមុខរឺទៅក្រោយនោះ !!!!…
ប្រភពៈ
http://mpec.sc.mahidol.ac.th/ipho2011/
